زهيريات

من طرف **R* Maher** 2008-04-26, 12:33 am

يا بحر الاوهام يمت تا نصل ساحلك
والعب بكيفك علي ما اني صرت ساحه لك
يامه بجفاك الجفن دم ودمع ساح الك
والن تزت بدليلي رماح وحرابي
وحملت لاجلك جليد شتاي وحر آبي
الدهر بجفاك ضدي ومعلن حروبي
ويكول ما جوز عنك ساحلك ساحلك
*************************
يمه رماني الهوى وحيلي بده محلل
ونار لبكلبي سعرت ما شافهه محلل
ناديت ولفي تعال بشوك وامحه الليل
واكرب عليك النبي والواحد الاحد
وزيح هم البدء من ثنين للاحد
وانه ييمه ان متت لاتتهمون احد
جتالي ذاك الترف ما هوب ومحلل
************************
حبل الموده حبيبي ارجوك بس متنه
وتدري علي ضيعت بجفاك بسمتنه
هلكت من حبكم يا ترف بس متنه ( اي ما انتظر)
سنين وانت على هرشك وشجره
ولو جاي جان بصرت فوك الخدود شجره
تدري يغالي بعد هجرك علي شجره؟
ما جره كلشي يساهي العين بس متنه
*********************
متت بغرامك وصرت يا نور عيني كحال
الغريق الذي جلب بكشه كحــــــــــــــل
انت مصيبة حسن من الشعر للكحل
وحسنك يغالي مثل سيف ضربني فشك
صدري ونزل على الكلب هم وصلتين انشك
انت بلي كحل عيونك ترمي فشك
تريد تهمدني درت فوك النواظر كحل؟؟؟؟؟؟؟
*********************
هامات كبل بعلو وبعد السقوط سقطت
واخلاق بعض الربع مدري شبلاهه سقطت
يا ريت ام النذل باول حملها سقطت
من جان ططعة لحم وهو بشهر اربعة
يا حيف باع الوطن باوراق ميه اربعه
حتى طفلنا بجه بيوم تسعه اربعه
يوم انذلينا وبغداد سقطت
**********************

يا صاح من الصغر عذبني عارك وطك
وحجايتي بي الوجة احجيها طك بطك
من جود دم الكلب ساكيتا عودي وطك
ديوان الي بي الحجي مو كل وكت قاذفة
قاذفني هوة بحجي وانا بشعر قاذفة
واجان وية الدرع ما تنفع القاذفة
شرياني امد سلك وانكلب عبوة واطك
********************
من لون عين الترف غارن جميع الخضر
ولشوفتو من الدمع صارن زياجي خضر
مرات احشم النبي ومرات احشم الخضر
يجمع شملنه مع الشوك وهدم حيلي
وغيرو من هل البشر بعيني فلا حالي
تره ماهجم بيتي وجتلني ولاعب بحالي
غير النواهي الشكر اهل العيون الخضر
*********************
هاي مطاردة بين الشاعر مالك الحزين وابن عمه برهان

يكول مالك:

ما رحتي هذا الكلب بوصال مرة انتي
ومرنتي كلبي على الهجران مرنتي
ردنه تمرين بشوك ياحلوة مره انتي
ما ردنه منج ذهب بس شوف خدج بس
وشحيتي بمواصلج ليما هرشنه يبس
حلوه وجميلة وجه وخدود تسحر بس
مرة انتي رغم الحلاة البيج مرة انتي

يردله برهان:

السمر زادن هموم وقهر في همنه
واصبحنه جنه في عيون البيض فهمنه
اذكر سمعنه اغنية بلسان فاه امنه
يا سمره مرلي بزعل لبياري مري انتي
يطفح غديري يلو تملين مره انتي
زين شلون حلوة وكمر وتكول مرة انتي
خربطت يمنه الغزل بس عود فهمنه

يكله مالك:

جرب وضوك المكر بصحونهن مره
اتوب وبعد ما تمر لديارهن مره
بيهن دهاء شكثر ادهى من اخو مره
وبيهن نجايب مثل خيل السبك برهان
وبيهن تعاند يلو تلكه الف برهان
ما حاجه تسال ولا تحتار يا برهان
حلوة حلاوة شكل بس بالطبع مره

يردله برهان:

كلتلهه ما رحتي كلبي بوصل مره انتي
وكلتلهه كلبي على الهجران مرنتي
تمسكنتلهه وكلت ياحلوة مري انتي
لكنها كالت للحديثات ما مره
وباذني سمعتهه ثلث مرات مو مره
والحلوة اظن بالشكل بالطبع مو مره
لكنها ما ترغبك وتكول مرة انتي